देनहार कोउ और है, भेजत सो दिन रैन ।
लोग भरम हम पै धरैं, याते नीचे नैन ॥ 1 ॥

बसि कुसंग चाहत कुसल, यह रहीम जिय सोस ।
महिमा घटी समुन्द्र की, रावन बस्यो परोस ॥ 2 ॥

रहिमन कुटिल कुठार ज्यों, कटि डारत द्वै टूक ।
चतुरन को कसकत रहे, समय चूक की हूक ॥ 3 ॥

अच्युत चरन तरंगिनी, शिव सिर मालति माल ।
हरि न बनायो सुरसरी, कीजो इंदव भाल ॥ 4 ॥

अमर बेलि बिनु मूल की, प्रतिपालत है ताहि ।
रहिमन ऐसे प्रभुहिं तजि, खोजत फिरिए काहि ॥ 5 ॥

अधम बचन ते को फल्यो, बैठि ताड़ की छाह ।
रहिमन काम न आइहै, ये नीरस जग मांह ॥ 6 ॥

अनुचित बचन न मानिए, जदपि गुराइसु गाढ़ि ।
है रहीम रघुनाथ ते, सुजस भरत को बाढ़ि ॥ 7 ॥

अनुचित उचित रहीम लघु, करहि बड़ेन के जोर ।
ज्यों ससि के संयोग से, पचवत आगि चकोर ॥ 8 ॥

अब रहीम मुसकिल परी, गाढ़े दोऊ काम ।
सांचे से तो जग नहीं, झूठे मिलैं न राम ॥ 9 ॥

ऊगत जाही किरण सों, अथवत ताही कांति ।
त्यों रहीम सुख दुख सबै, बढ़त एक ही भांति ॥ 10 ॥

आप न काहू काम के, डार पात फल फूल ।
औरन को रोकत फिरैं, रहिमन पेड़ बबूल ॥ 11 ॥

आदर घटे नरेस ढिग, बसे रहे कछु नाहिं ।
जो रहीम कोटिन मिले, धिक जीवन जग माहिं ॥ 12 ॥

आवत काज रहीम कहि, गाढ़े बंधे सनेह ।
जीरन होत न पेड़ ज्यों, थामें बरै बरेह ॥ 13 ॥

अरज गरज मानै नहीं, रहिमन ये जन चारि ।
रिनियां राजा मांगता, काम आतुरी नारि ॥ 14 ॥

एकै साधे सब सधै, सब साधे सब जाय ।
रहिमन मूलहिं सींचिबो, फूलै फलै अघाय ॥ 15 ॥

अंजन दियो तो किरकिरी, सुरमा दियो न जाय ।
जिन आंखिन सों हरि लख्यो, रहिमन बलि बलि जाय ॥ 16 ॥

अंतर दाव लगी रहै, धुआं न प्रगटै सोय ।
कै जिय जाने आपुनो, जा सिर बीती होय ॥ 17 ॥

असमय परे रहीम कहि, मांगि जात तजि लाज ।
ज्यों लछमन मांगन गए, पारसार के नाज ॥ 18 ॥

अंड न बौड़ रहीम कहि, देखि सचिककन पान ।
हस्ती ढकका कुल्हड़िन, सहैं ते तरुवर आन ॥ 19 ॥

उरग तुरग नारी नृपति, नीच जाति हथियार ।
रहिमन इन्हें संभारिए, पलटत लगै न बार ॥ 20 ॥

करत निपुनई, गुण बिना, रहिमन निपुन हजीर ।
मानहु टेरत बिटप चढ़ि, मोहिं समान को कूर ॥ 21 ॥

ओछो काम बड़ो करैं, तो न बड़ाई होय ।
ज्यों रहीम हनुमंत को, गिरधर कहै न कोय ॥ 22 ॥

कमला थिर न रहीम कहि, यह जानत सब कोय ।
पुरूष पुरातन की बधू, क्यों न चंचला होय ॥ 23 ॥

कमला थिर न रहीम कहि, लखत अधम जे कोय ।
प्रभु की सो अपनी कहै, क्यों न फजीहत होय ॥ 24 ॥

करमहीन रहिमन लखो, धसो बड़े घर चोर ।
चिंतत ही बड़ लाभ के, जगत ह्रैगो भोर ॥ 25 ॥

कहि रहीम धन बढ़ि घटे, जात धनिन की बात ।
घटै बढ़े उनको कहा, घास बेचि जे खात ॥ 26 ॥

कहि रहीम संपति सगे, बनत बहुत बहु रीत ।
बिपति कसौटी जे कसे, तेई सांचे मीत ॥ 27 ॥

कहि रहीम या जगत तें, प्रीति गई दै टेर ।
रहि रहीम नर नीच में, स्वारथ स्वारथ टेर ॥ 28 ॥

कहु रहीम केतिक रही, केतिक गई बिहाय ।
माया ममता मोह परि, अन्त चले पछिताय ॥ 29 ॥

कहि रहीम इक दीप तें, प्रगट सबै दुति होय ।
तन सनेह कैसे दुरै, दूग दीपक जरु होय ॥ 30 ॥

कहु रहीम कैसे बनै, अनहोनी ह्रै जाय ।
मिला रहै औ ना मिलै, तासों कहा बसाय ॥ 31 ॥

काज परे कछु और है, काज सरे कछु और ।
रहिमन भंवरी के भए, नदी सिरावत मौर ॥ 32 ॥

कहु रहीम कैसे निभै, बेर केर को संग ।
वे डोलत रस आपने, उनके फाटत अंग ॥ 33 ॥

कागद को सो पूतरा, सहजहि में घुलि जाय ।
रहिमन यह अचरज लखो, सोऊ खैंचत बाय ॥ 34 ॥

काम न काहू आवई, मोल रहीम न लेई ।
बाजू टूटे बाज को, साहब चारा देई ॥ 35 ॥

कैसे निबहैं निबल जन, करि सबलन सों गैर ।
रहिमन बसि सागर बिषे, करत मगस सों बैर ॥ 36 ॥

काह कामरी पागरी, जाड़ गए से काज ।
रहिमन भूख बुताइए, कैस्यो मिलै अनाज ॥ 37 ॥

कहा करौं बैकुंठ लै, कल्प बृच्छ की छांह ।
रहिमन ढाक सुहावनै, जो गल पीतम बांह ॥ 38 ॥

कुटिलत संग रहीम कहि, साधू बचते नांहि ।
ज्यों नैना सैना करें, उरज उमेठे जाहि ॥ 39 ॥

को रहीम पर द्वार पै, जात न जिय सकुचात ।
संपति के सब जात हैं, बिपति सबै लै जात ॥ 40 ॥

गगन चढ़े फरक्यो फिरै, रहिमन बहरी बाज ।
फेरि आई बंधन परै, अधम पेट के काज ॥ 41 ॥

खरच बढ़यो उद्द्म घटयो, नृपति निठुर मन कीन ।
कहु रहीम कैसे जिए, थोरे जल की मीन ॥ 42 ॥

खैर खून खासी खुसी, बैर प्रीति मदपान ।
रहिमन दाबे न दबैं, जानत सकल जहान ॥ 43 ॥

खीरा को मुंह काटि के, मलियत लोन लगाय ।
रहिमन करुए मुखन को, चहियत इहै सजाय ॥ 44 ॥

गति रहीम बड़ नरन की, ज्यों तुरंग व्यवहार ।
दाग दिवावत आप तन, सही होत असवार ॥ 45 ॥

गहि सरनागत राम की, भव सागर की नाव ।
रहिमन जगत उधार कर, और न कछु उपाव ॥ 46 ॥

गुरुता फबै रहीम कहि, फबि आई है जाहि ।
उर पर कुच नीके लगैं, अनत बतौरी आहिं ॥ 47 ॥

गुनते लेत रहीम जन, सलिल कूपते काढ़ि ।
कूपहु ते कहुं होत है, मन काहू के बाढ़ि ॥ 48 ॥

गरज आपनी आप सों, रहिमन कही न जाय ।
जैसे कुल की कुलवधु, पर घर जात लजाय ॥ 49 ॥

चढ़िबो मोम तुरंग पर, चलिबो पावक मांहि ।
प्रेम पंथ ऐसो कठिन, सब कोउ निबहत नाहिं ॥ 50 ॥

चित्रकूट में रमि रहे, रहिमन अवध नरेस ।
जापर विपदा पड़त है, सो आवत यहि देस ॥ 51 ॥

छोटेन सों सोहैं बड़े, कहि रहीम यह लेख ।
सहसन को हय बांधियत, लै दमरी की मेख ॥ 52 ॥

चरन छुए मस्तक छुए, तेहु नहिं छांड़ति पानि ।
हियो छुवत प्रभु छोड़ि दै, कहु रहीम का जानि ॥ 53 ॥

चारा प्यारा जगत में, छाल हित कर लेइ ।
ज्यों रहीम आटा लगे, त्यों मृदंग सुर देह ॥ 54 ॥

छमा बड़ेन को चाहिए, छोटेन को उत्पात ।
का रहीम हरि जो घट्यो, जो भृगु मारी लात ॥ 55 ॥

जलहिं मिलाइ रहीम ज्यों, कियों आपु सग छीर ।
अगवहिं आपुहि आप त्यों, सकल आंच की भीर ॥ 56 ॥

जब लगि जीवन जगत में, सुख-दु:ख मिलन अगोट ।
रहिमन फूटे गोट ज्यों, परत दुहुन सिर चोट ॥ 57 ॥

जहां गांठ तहं रस नहीं, यह रहीम जग जोय ।
मंडप तर की गांठ में, गांठ गांठ रस होय ॥ 58 ॥

जब लगि विपुने न आपनु, तब लगि मित्त न कोय ।
रहिमन अंबुज अंबु बिन, रवि ताकर रिपु होय ॥ 59 ॥

जाल परे जल जात बहि, तजि मीनन को मोह ।
रहिमन मछरी नीर को, तऊ न छांड़ति छोह ॥ 60 ॥

जे अनुचितकारी तिन्हे, लगे अंक परिनाम ।
लखे उरज उर बेधिए, क्यों न होहि मुख स्याम ॥ 61 ॥

जे गरीब सों हित करै, धनि रहीम वे लोग ।
कहा सुदामा बापुरो, कृष्ण मिताई जोग ॥ 62 ॥

जेहि रहीम तन मन लियो, कियो हिय बिचमौन ।
तासों सुख-दुख कहन की, रही बात अब कौन ॥ 63 ॥

जेहि अंचल दीपक दुरयो, हन्यो सो ताही गात ।
रहिमन असमय के परे, मित्र शत्रु है जात ॥ 64 ॥

जे रहीम विधि बड़ किए, को कहि दूषन काढ़ि ।
चन्द्र दूबरो कूबरो, तऊ नखत ते बाढ़ि ॥ 65 ॥

जैसी परै सो सहि रहै, कहि रहीम यह देह ।
धरती ही पर परत हैं, सीत घाम और मेह ॥ 66 ॥

जो पुरुषारथ ते कहूं, संपति मिलत रहीम ।
पेट लागि बैराट घर, तपत रसोई भीम ॥ 67 ॥

जे सुलगे ते बुझि गए, बुझे तो सुलगे नाहिं ।
रहिमन दाहे प्रेम के, बुझि बुझि के सुलगाहिं ॥ 68 ॥

जो घर ही में घुसि रहै, कदली सुपत सुडील ।
तो रहीम तिन ते भले, पथ के अपत करील ॥ 69 ॥

जो बड़ेन को लघु कहे, नहिं रहीम घटि जांहि ।
गिरिधर मुरलीधर कहे, कछु दुख मानत नांहि ॥ 70 ॥

जो रहीम करिबो हुतो, ब्रज को यही हवाल ।
तो काहे कर पर धरयो, गोबर्धन गोपाल ॥ 71 ॥

जो रहीम उत्तम प्रकृति, का करि सकत कुसंग ।
चन्दन विष व्यापत नहीं, लपटे रहत भुजंग ॥ 72 ॥

जो रहीम ओछो बढ़ै, तौ ही इतराय ।
प्यादे सों फरजी भयो, टेढ़ो टेढ़ो जाय ॥ 73 ॥

जो मरजाद चली सदा, सोइ तो ठहराय ।
जो जल उमगें पार तें, सो रहीम बहि जाय ॥ 74 ॥

जो रहीम गति दीप की, कुल कपूत गति सोय ।
बारे उजियारे लगै, बढ़े अंधेरो होय ॥ 75 ॥

जो रहीम दीपक दसा, तिय राखत पट ओट ।
समय परे ते होत है, वाही पट की चोट ॥ 76 ॥

जो रहीम भावी कतहुं, होति आपने हाथ ।
राम न जाते हरिन संग, सीय न रावण साथ ॥ 77 ॥

जो रहीम मन हाथ है, तो मन कहुं किन जाहि ।
ज्यों जल में छाया परे, काया भीजत नाहिं ॥ 78 ॥

जो रहीम होती कहूं, प्रभु गति अपने हाथ ।
तो काधों केहि मानतो, आप बढ़ाई साथ ॥ 79 ॥

जो रहीम पगतर परो, रगरि नाक अरु सीस ।
निठुरा आगे रोयबो, आंसु गारिबो खीस ॥ 80 ॥

जो विषया संतन तजो, मूढ़ ताहि लपटात ।
ज्यों नर डारत वमन कर, स्वान स्वाद सो खात ॥ 81 ॥

टूटे सुजन मनाइए, जो टूटे सौ बार ।
रहिमन फिरि फिरि पोहिए, टूटे मुक्ताहार ॥ 82 ॥

जो रहीम रहिबो चहो, कहौ वही को ताउ ।
जो नृप वासर निशि कहे, तो कचपची दिखाउ ॥ 83 ॥

ज्यों नाचत कठपूतरी, करम नचावत गात ।
अपने हाथ रहीम ज्यों, नहीं आपने हाथ ॥ 84 ॥

तरुवर फल नहीं खात है, सरवर पियत न पान ।
कहि रहीम परकाज हित, संपति-सचहिं सुजान ॥ 85 ॥

तैं रहीम मन आपनो, कीन्हो चारु चकोर ।
निसि वासर लाग्यो रहै, कृष्ण्चन्द्र की ओर ॥ 86 ॥

तन रहीम है करम बस, मन राखौ वहि ओर ।
जल में उलटी नाव ज्यों, खैंचत गुन के जोर ॥ 87 ॥

तै रहीम अब कौन है, एती खैंचत बाय ।
खस काजद को पूतरा, नमी मांहि खुल जाय ॥ 88 ॥

तबहीं लो जीबो भलो, दीबो होय न धीम ।
जग में रहिबो कुचित गति, उचित न होय रहीम ॥ 89 ॥

तासो ही कछु पाइए, कीजे जाकी आस ।
रीते सरवर पर गए, कैसे बुझे पियास ॥ 90 ॥

दादुर, मोर, किसान मन, लग्यौ रहै धन मांहि ।
पै रहीम चाकत रटनि, सरवर को कोउ नाहि ॥ 91 ॥

थोथे बादर क्वार के, ज्यों रहीम घहरात ।
धनी पुरुष निर्धन भए, करे पाछिली बात ॥ 92 ॥

दिव्य दीनता के रसहिं, का जाने जग अन्धु ।
भली विचारी दीनता, दीनबन्धु से बन्धु ॥ 93 ॥

दीन सबन को लखत है, दीनहिं लखै न कोय ।
जो रहीम दीनहिं लखत, दीबन्धु सम होय ॥ 94 ॥

दुरदिन परे रहीम कहि, भूलत सब पहिचानि ।
सोच नहीं वित हानि को, जो न होय हित हानि ॥ 95 ॥

दीरघ दोहा अरथ के, आरवर थोरे आहिं ।
ज्यों रहीम नट कुंडली, सिमिटि कूदि चढ़ि जाहि ॥ 96 ॥

दुरदिन परे रहीम कहि, दुश्थल जैयत भागि ।
ठाढ़े हूजत घूर पर, जब घर लागति आगि ॥ 97 ॥

दु:ख नर सुनि हांसि करैं, धरत रहीम न धीर ।
कही सुनै सुनि सुनि करै, ऐसे वे रघुबीर ॥ 98 ॥

धनि रहीम जलपंक को, लघु जिय पियत अघाय ।
उदधि बड़ाई कौन है, जगत पिआसो जाय ॥ 99 ॥

धन थोरो इज्जत बड़ी, कह रहीम का बात ।
जैसे कुल की कुलवधु, चिथड़न माहि समात ॥ 100 ॥

Denahaar Kou Aor Hai, Bhejat So Din Rain ;
log Bharam Ham Pai Dharain, Yaate Neeche Nain ॥ 1 ॥

Basi Kusang Chaahat Kusala, Yah Raheem Jiy Sos ;
mahimaa Ghatee Samundr Kee, Raavan Basyo Paros ॥ 2 ॥

Rahiman Kutil Kuthaar Jyon, Kati Daarat Dvai Took ;
chaturan Ko Kasakat Rahe, Samay Chook Kee Hook ॥ 3 ॥

Achyut Charan Taranginee, Shiv Sir Maalati Maal ;
hari N Banaayo Surasaree, Keejo Indav Bhaal ॥ 4 ॥

Amar Beli Binu Mool Kee, Pratipaalat Hai Taahi ;
rahiman Aise Prabhuhi Taji, Khojat Phirie Kaahi ॥ 5 ॥

Adham Bachan Te Ko Phalyo, Baithi Taadd Kee Chhaah ;
rahiman Kaam N Aaihai, Ye Neeras Jag Maanh ॥ 6 ॥

Anuchit Bachan N Maanie, Jadapi Guraaisu Gaaddhi ;
hai Raheem Raghunaath Te, Sujas Bharat Ko Baaddhi ॥ 7 ॥

Anuchit Uchit Raheem Laghu, Karahi Badden Ke Jor ;
jyo Sasi Ke Sanyog Se, Pachavat Aagi Chakor ॥ 8 ॥

Ab Raheem Musakil Paree, Gaaddhe Dooo Kaam ;
saanche Se To Jag Naheen, Jhoothe Milai N Raam ॥ 9 ॥

Oogat Jaahee Kiran Son, Athavat Taahee Kaanti ;
tyo Raheem Sukh Dukh Sabai, Baddhat Ek Hee Bhaanti ॥ 10 ॥

Aap N Kaahoo Kaam Ke, Daar Paat Phal Phool ;
aoran Ko Rokat Phirain, Rahiman Pedd Babool ॥ 11 ॥

aadar Ghate Nares Dhiga, Base Rahe Kachhu Naahi ;
jo Raheem Kotin Mile, Dhik Jeevan Jag Maahi ॥ 12 ॥

Aavat Kaaj Raheem Kahi, Gaaddhe Bandhe Saneh ;
jeeran Hot N Pedd Jyon, Thaame Barai Bareh ॥ 13 ॥

Araj Garaj Maanai Naheen, Rahiman Ye Jan Chaari ;
riniyaa Raajaa Maangataa, Kaam Aaturee Naari ॥ 14 ॥

Ekai Saadhe Sab Sadhai, Sab Saadhe Sab Jaay ;
rahiman Moolahi Seenchibo, Phoolai Phalai Aghaay ॥ 15 ॥

Anjan Diyo To Kirakiree, Suramaa Diyo N Jaay ;
jin Aankhin So Hari Lakhyo, Rahiman Bali Bali Jaay ॥ 16 ॥

Antar Daav Lagee Rahai, Dhuaa N Pragatai Soy ;
kai Jiy Jaane Aapuno, Jaa Sir Beetee Hoy ॥ 17 ॥

Asamay Pare Raheem Kahi, Maangi Jaat Taji Laaj ;
jyo Lachhaman Maangan Gae, Paarasaar Ke Naaj ॥ 18 ॥

And N Baudd Raheem Kahi, Dekhi Sachikakan Paan ;
hastee Dhakakaa Kulhaddina, Sahai Te Taruvar Aan ॥ 19 ॥

Urag Turag Naaree Nripati, Neech Jaati Hathiyaar ;
rahiman Inhe Sanbhaarie, Palatat Lagai N Baar ॥ 20 ॥

Karat Nipunaee, Gun Binaa, Rahiman Nipun Hajeer ;
maanahu Terat Bitap Chaddhi, Mohi Samaan Ko Koor ॥ 21 ॥

Ochho Kaam Baddo Karain, To N Baddaaee Hoy ;
jyo Raheem Hanumant Ko, Giradhar Kahai N Koy ॥ 22 ॥

kamalaa Thir N Raheem Kahi, Yah Jaanat Sab Koy ;
puroosh Puraatan Kee Badhoo, Kyo N Chanchalaa Hoy ॥ 23 ॥

Kamalaa Thir N Raheem Kahi, Lakhat Adham Je Koy ;
prabhu Kee So Apanee Kahai, Kyo N Phajeehat Hoy ॥ 24 ॥

Karamaheen Rahiman Lakho, Dhaso Badde Ghar Chor ;
chintat Hee Badd Laabh Ke, Jagat Hraigo Bhor ॥ 25 ॥

Kahi Raheem Dhan Baddhi Ghate, Jaat Dhanin Kee Baat ;
ghatai Baddhe Unako Kahaa, Ghaas Bechi Je Khaat ॥ 26 ॥

Kahi Raheem Sanpati Sage, Banat Bahut Bahu Reet ;
bipati Kasautee Je Kase, Teee Saanche Meet ॥ 27 ॥

Kahi Raheem Yaa Jagat Ten, Preeti Gaee Dai Ter ;
rahi Raheem Nar Neech Men, Svaarath Svaarath Ter ॥ 28 ॥

Kahu Raheem Ketik Rahee, Ketik Gaee Bihaay ;
maayaa Mamataa Moh Pari, Ant Chale Pachhitaay ॥ 29 ॥

Kahi Raheem Ik Deep Ten, Pragat Sabai Duti Hoy ;
tan Saneh Kaise Durai, Doog Deepak Jaru Hoy ॥ 30 ॥

Kahu Raheem Kaise Banai, Anahonee Hrai Jaay ;
milaa Rahai Ao Naa Milai, Taaso Kahaa Basaay ॥ 31 ॥

Kaaj Pare Kachhu Aor Hai, Kaaj Sare Kachhu Aor ;
rahiman Bhanvaree Ke Bhae, Nadee Siraavat Maur ॥ 32 ॥

Kahu Raheem Kaise Nibhai, Ber Ker Ko Sang ;
ve Dolat Ras Aapane, Unake Phaatat Ang ॥ 33 ॥

kaagad Ko So Pootaraa, Sahajahi Me Ghuli Jaay ;
rahiman Yah Acharaj Lakho, Sooo Khainchat Baay ॥ 34 ॥

Kaam N Kaahoo Aavaee, Mol Raheem N Leee ;
baajoo Toote Baaj Ko, Saahab Chaaraa Deee ॥ 35 ॥

Kaise Nibahai Nibal Jana, Kari Sabalan So Gair ;
rahiman Basi Saagar Bishe, Karat Magas So Bair ॥ 36 ॥

Kaah Kaamaree Paagaree, Jaadd Gae Se Kaaj ;
rahiman Bhookh Butaaie, Kaisyo Milai Anaaj ॥ 37 ॥

Kahaa Karau Baikunth Lai, Kalp Brichchh Kee Chhaanh ;
rahiman Dhaak Suhaavanai, Jo Gal Peetam Baanh ॥ 38 ॥

Kutilat Sang Raheem Kahi, Saadhoo Bachate Naanhi ;
jyo Nainaa Sainaa Karen, Uraj Umethe Jaahi ॥ 39 ॥

Ko Raheem Par Dvaar Pai, Jaat N Jiy Sakuchaat ;
sanpati Ke Sab Jaat Hain, Bipati Sabai Lai Jaat ॥ 40 ॥

Gagan Chaddhe Pharakyo Phirai, Rahiman Baharee Baaj ;
pheri Aaee Bandhan Parai, Adham Pet Ke Kaaj ॥ 41 ॥

Kharach Baddhayo Uddm Ghatayo, Nripati Nithur Man Keen ;
kahu Raheem Kaise Jie, Thore Jal Kee Meen ॥ 42 ॥

Khair Khoon Khaasee Khusee, Bair Preeti Madapaan ;
rahiman Daabe N Dabain, Jaanat Sakal Jahaan ॥ 43 ॥

Kheeraa Ko Munh Kaati Ke, Maliyat Lon Lagaay ;
rahiman Karue Mukhan Ko, Chahiyat Ihai Sajaay ॥ 44 ॥

gati Raheem Badd Naran Kee, Jyo Turang Vyavahaar ;
daag Divaavat Aap Tana, Sahee Hot Asavaar ॥ 45 ॥

Gahi Saranaagat Raam Kee, Bhav Saagar Kee Naav ;
rahiman Jagat Udhaar Kara, Aor N Kachhu Upaav ॥ 46 ॥

Gurutaa Phabai Raheem Kahi, Phabi Aaee Hai Jaahi ;
ur Par Kuch Neeke Lagain, Anat Batauree Aahi ॥ 47 ॥

Gunate Let Raheem Jana, Salil Koopate Kaaddhi ;
koopahu Te Kahu Hot Hai, Man Kaahoo Ke Baaddhi ॥ 48 ॥

Garaj Aapanee Aap Son, Rahiman Kahee N Jaay ;
jaise Kul Kee Kulavadhu, Par Ghar Jaat Lajaay ॥ 49 ॥

Chaddhibo Mom Turang Para, Chalibo Paavak Maanhi ;
prem Panth Aiso Kathina, Sab Kou Nibahat Naahi ॥ 50 ॥

Chitrakoot Me Rami Rahe, Rahiman Avadh Nares ;
jaapar Vipadaa Paddat Hai, So Aavat Yahi Des ॥ 51 ॥

Chhoten So Sohai Badde, Kahi Raheem Yah Lekh ;
sahasan Ko Hay Baandhiyata, Lai Damaree Kee Mekh ॥ 52 ॥

Charan Chhue Mastak Chhue, Tehu Nahi Chhaanddati Paani ;
hiyo Chhuvat Prabhu Chhoddi Dai, Kahu Raheem Kaa Jaani ॥ 53 ॥

Chaaraa Pyaaraa Jagat Men, Chhaal Hit Kar Lei ;
jyo Raheem Aataa Lage, Tyo Mridang Sur Deh ॥ 54 ॥

Chhamaa Badden Ko Chaahie, Chhoten Ko Utpaat ;
kaa Raheem Hari Jo Ghatyo, Jo Bhrigu Maaree Laat ॥ 55 ॥

jalahi Milaai Raheem Jyon, Kiyo Aapu Sag Chheer ;
agavahi Aapuhi Aap Tyon, Sakal Aanch Kee Bheer ॥ 56 ॥

Jab Lagi Jeevan Jagat Men, Sukh-du:kh Milan Agot ;
rahiman Phoote Got Jyon, Parat Duhun Sir Chot ॥ 57 ॥

Jahaa Gaanth Taha Ras Naheen, Yah Raheem Jag Joy ;
mandap Tar Kee Gaanth Men, Gaanth Gaanth Ras Hoy ॥ 58 ॥

Jab Lagi Vipune N Aapanu, Tab Lagi Mitt N Koy ;
rahiman Anbuj Anbu Bina, Ravi Taakar Ripu Hoy ॥ 59 ॥

Jaal Pare Jal Jaat Bahi, Taji Meenan Ko Moh ;
rahiman Machharee Neer Ko, Taoo N Chhaanddati Chhoh ॥ 60 ॥

Je Anuchitakaaree Tinhe, Lage Ank Parinaam ;
lakhe Uraj Ur Bedhie, Kyo N Hohi Mukh Syaam ॥ 61 ॥

Je Gareeb So Hit Karai, Dhani Raheem Ve Log ;
kahaa Sudaamaa Baapuro, Krishn Mitaaee Jog ॥ 62 ॥

Jehi Raheem Tan Man Liyo, Kiyo Hiy Bichamaun ;
taaso Sukh-dukh Kahan Kee, Rahee Baat Ab Kaun ॥ 63 ॥

Jehi Anchal Deepak Durayo, Hanyo So Taahee Gaat ;
rahiman Asamay Ke Pare, Mitr Shatru Hai Jaat ॥ 64 ॥

Je Raheem Vidhi Badd Kie, Ko Kahi Dooshan Kaaddhi ;
chandr Doobaro Koobaro, Taoo Nakhat Te Baaddhi ॥ 65 ॥

Jaisee Parai So Sahi Rahai, Kahi Raheem Yah Deh ;
dharatee Hee Par Parat Hain, Seet Ghaam Aor Meh ॥ 66 ॥

jo Purushaarath Te Kahoon, Sanpati Milat Raheem ;
pet Laagi Bairaat Ghara, Tapat Rasoee Bheem ॥ 67 ॥

Je Sulage Te Bujhi Gae, Bujhe To Sulage Naahi ;
rahiman Daahe Prem Ke, Bujhi Bujhi Ke Sulagaahi ॥ 68 ॥

Jo Ghar Hee Me Ghusi Rahai, Kadalee Supat Sudeel ;
to Raheem Tin Te Bhale, Path Ke Apat Kareel ॥ 69 ॥

Jo Badden Ko Laghu Kahe, Nahi Raheem Ghati Jaanhi ;
giridhar Muraleedhar Kahe, Kachhu Dukh Maanat Naanhi ॥ 70 ॥

Jo Raheem Karibo Huto, Braj Ko Yahee Havaal ;
to Kaahe Kar Par Dharayo, Gobardhan Gopaal ॥ 71 ॥

Jo Raheem Uttam Prakriti, Kaa Kari Sakat Kusang ;
chandan Vish Vyaapat Naheen, Lapate Rahat Bhujang ॥ 72 ॥

Jo Raheem Ochho Baddhai, Tau Hee Itaraay ;
pyaade So Pharajee Bhayo, Teddho Teddho Jaay ॥ 73 ॥

Jo Marajaad Chalee Sadaa, Soi To Thaharaay ;
jo Jal Umage Paar Ten, So Raheem Bahi Jaay ॥ 74 ॥

Jo Raheem Gati Deep Kee, Kul Kapoot Gati Soy ;
baare Ujiyaare Lagai, Baddhe Andhero Hoy ॥ 75 ॥

Jo Raheem Deepak Dasaa, Tiy Raakhat Pat Ot ;
samay Pare Te Hot Hai, Vaahee Pat Kee Chot ॥ 76 ॥

Jo Raheem Bhaavee Katahun, Hoti Aapane Haath ;
raam N Jaate Harin Sanga, Seey N Raavan Saath ॥ 77 ॥

jo Raheem Man Haath Hai, To Man Kahu Kin Jaahi ;
jyo Jal Me Chhaayaa Pare, Kaayaa Bheejat Naahi ॥ 78 ॥

Jo Raheem Hotee Kahoon, Prabhu Gati Apane Haath ;
to Kaadho Kehi Maanato, Aap Baddhaaee Saath ॥ 79 ॥

Jo Raheem Pagatar Paro, Ragari Naak Aru Sees ;
nithuraa Aage Royabo, Aansu Gaaribo Khees ॥ 80 ॥

Jo Vishayaa Santan Tajo, Mooddh Taahi Lapataat ;
jyo Nar Daarat Vaman Kara, Svaan Svaad So Khaat ॥ 81 ॥

Toote Sujan Manaaie, Jo Toote Sau Baar ;
rahiman Phiri Phiri Pohie, Toote Muktaahaar ॥ 82 ॥

Jo Raheem Rahibo Chaho, Kahau Vahee Ko Taau ;
jo Nrip Vaasar Nishi Kahe, To Kachapachee Dikhaau ॥ 83 ॥

Jyo Naachat Kathapootaree, Karam Nachaavat Gaat ;
apane Haath Raheem Jyon, Nahee Aapane Haath ॥ 84 ॥

Taruvar Phal Nahee Khaat Hai, Saravar Piyat N Paan ;
kahi Raheem Parakaaj Hita, Sanpati-sachahi Sujaan ॥ 85 ॥

Tai Raheem Man Aapano, Keenho Chaaru Chakor ;
nisi Vaasar Laagyo Rahai, Krishnchandr Kee Or ॥ 86 ॥

Tan Raheem Hai Karam Basa, Man Raakhau Vahi Or ;
jal Me Ulatee Naav Jyon, Khainchat Gun Ke Jor ॥ 87 ॥

Tai Raheem Ab Kaun Hai, Etee Khainchat Baay ;
khas Kaajad Ko Pootaraa, Namee Maanhi Khul Jaay ॥ 88 ॥

tabahee Lo Jeebo Bhalo, Deebo Hoy N Dheem ;
jag Me Rahibo Kuchit Gati, Uchit N Hoy Raheem ॥ 89 ॥

Taaso Hee Kachhu Paaie, Keeje Jaakee Aas ;
reete Saravar Par Gae, Kaise Bujhe Piyaas ॥ 90 ॥

Daadura, Mora, Kisaan Mana, Lagyau Rahai Dhan Maanhi ;
pai Raheem Chaakat Ratani, Saravar Ko Kou Naahi ॥ 91 ॥

Thothe Baadar Kvaar Ke, Jyo Raheem Ghaharaat ;
dhanee Purush Nirdhan Bhae, Kare Paachhilee Baat ॥ 92 ॥

Divy Deenataa Ke Rasahin, Kaa Jaane Jag Andhu ;
bhalee Vichaaree Deenataa, Deenabandhu Se Bandhu ॥ 93 ॥

Deen Saban Ko Lakhat Hai, Deenahi Lakhai N Koy ;
jo Raheem Deenahi Lakhata, Deebandhu Sam Hoy ॥ 94 ॥

Duradin Pare Raheem Kahi, Bhoolat Sab Pahichaani ;
soch Nahee Vit Haani Ko, Jo N Hoy Hit Haani ॥ 95 ॥

Deeragh Dohaa Arath Ke, Aaravar Thore Aahi ;
jyo Raheem Nat Kundalee, Simiti Koodi Chaddhi Jaahi ॥ 96 ॥

Duradin Pare Raheem Kahi, Dushthal Jaiyat Bhaagi ;
thaaddhe Hoojat Ghoor Para, Jab Ghar Laagati Aagi ॥ 97 ॥

Du:kh Nar Suni Haansi Karain, Dharat Raheem N Dheer ;
kahee Sunai Suni Suni Karai, Aise Ve Raghubeer ॥ 98 ॥

Dhani Raheem Jalapank Ko, Laghu Jiy Piyat Aghaay ;
udadhi Baddaaee Kaun Hai, Jagat Piaaso Jaay ॥ 99 ॥

dhan Thoro Ijjat Baddee, Kah Raheem Kaa Baat ;
jaise Kul Kee Kulavadhu, Chithaddan Maahi Samaat ॥ 100 ॥